D’Schdrumpfhosa hend gjugged. Firs Schnäbberle gab’s an Eigriff.
Ein Wetter Hin und Her ohne Ende, heiß, schwül, Gewitter – ein richtiger Sommer. Und ganz ehrlich, am Wetter kann auch der Schwabe immer etwas zum Nörgeln finden: zu warm, zu kalt, zu trocken, zu nass.
Abr am Wochaend war’s obends ja drogga ond deswega hammr a guade Bardwurschd aufs Feir gschmissa, ja, swared a baar mehr als bloß oine ond Kohla hend lang gloschdred. Ond an guada Kardofflsalad hods drzua geba, so an richdiga
Schwäbischa Kardofflsalad aus mehlige Kardoffla, mid Zwiebl, Essig, Eelond ra selbrgmachda Fleischbria. Es Greaschde abr war, dr Kardofflsalad war madschig, schee verfalla ond no warm. Aufm Dellr hab i dann no a weng an Gurgasalad druntrgriard – des isch dann ja echd ’s Hegschde fr an Schwob. Des war dr Ausgleich fir den eiskalda Kartoffelsalad aus speckige Kardoffla dia ned zrfalled, mid Speck drin in ner weiß Pampe ausm Eimer zum Schollafilee, des i an der Oschdsee vergangene Woch ghabd hab - also der schbezielle hod mir garned daugd. Abr dr Fisch war richdig guad.
Ond so beim Essa ond Radscha, hammer ibr Ledrhosa gschwädzd, ibr de kurze ond dass mer wenn’s kald wora isch immer no drmit romgrend send. Ond alle hend mr feschdgschdelled, dass mir ondr d’Ledrbix a Schdrumbfhos hend anzia missa, egal ob Buba odr Mädla. Swared immer so blaue, rote odr greane Hosa mit Feinripp, faschd wia de alde Ondrhosa. Ond wenn d’Muadr beim Neischlubfa ned aufbassd hod, dann war’s Hendrdoil vorn ond des hod garid bassd ond zwigged – gsea hod mas an dr Nood: Vorn hend dia Dingr bloß oi Nood ghed, henda firs Fidla zwoi. Dia wared domoals unisex, do hods bloß oi Modell gea fr Buba ond Mädla – zwigged hed se immr. Schbädr hod’s dann dia Schdrumbfhosa fird Buba au mid Eigriff frs Schnäbbrle gea. Abr allwei hend se saggrisch gjugged … koinr hod se gwelled. Ond wenn se zlang wared, sen se vorn bei de Sandala rausghänged, bis di auf d’Gosch gschlaga hod.
Kommentare