Region: Augsburg Stadt

Schwäbische Weihnacht: Wia dr Rudi em Niklaus gholfa hat

So schtellt si dia gloi Resi da Rudi vor.

A Gschichtle ibr Weihnachta, Gschenkla ond an ganz bsondara Hirsch.

Ja, Ihr liabe Leit, es isch scho mea so weit: D’Weihnacht stat vor dr Diar ond drinna hockand Kendr ond Erwachsne zamma ond singand ond verzähland si G’schichtla. Oi so a G’schicht det i eich, liabe Lesarinna und Lesar, jetzt au verzähle ond zwar gats in dera G’schicht um an junga Hirsch. Noi, id dr Bambi, wenn ihr des gmoint habts. Es gat um da Rudi.

Blos wia fang i dia G’schicht jetzat a? Am beschte werd sei, i hol a bissle weitr aus, damit ihr verstandant, wer dr Rudi iberhaupt‘s isch. Also: Es wissent ja alle, daas bei ons des Grischtkend dia G’schenkla und Paketla brengt ond onder dr Grischtbaum leggt, daas dia Kendr a Freid hand. Abr ihr brauchts id moina, daas des iberall auf dr Welt so isch. Gat ja au gar id, des werent ja vill z‘vill Kendr ond Grischtbeim. D’rum brengt zom Beischb‘l z’Amerika drib id des Grischtkend selbr dia G’schenkla, sondern dr Niklaus. Hoi, werdets ihr jetzt saga, dr Niklaus-Dag isch doch scho am seksta Dehzembr ond do habts ihr freili recht. Abr weil‘r bei ons scho vorher isch, hot dr Niklaus ja Drweil am Heiliga Obad ond ka a weng aushelfa.

Jetzt isch dr Niklaus abr scho a altr Ma, des sigsch ja an seim weißa Bart. Ond weil’r halt nemme so guat z‘Fuaß isch, wia des flinke Grischtkend, brengt er dia Gschenkla midm Schlitta. Ond was moints jetz ihr, wer do eigspannat isch en deam Schlitta? Pfeilgrad: Hirsch!

So stuggara acht Hirsch hot dr Niklaus in seim Stall standa. Ond a jeder Hirsch hoißt au ganz bsondrs. Do isch der Donnr ond dr Blitz, dr Sausr ond s’Biable, dr Komet ond dr Fuchs, dr Scharwanzlr ond s’Danzerle – do merksch scho an dia Nima, daas des ganz bsondre Viacher sin. Ond zwar kennant dia alle a so schnell renna, daas dr Schlitta vom Niklaus durch d’Luft fliagt. Des kasch jetzt glauba odr id; abr bessr werd sei, du glaubsch es. Jedafalls isch do noamol a Hirsch und des war dr Rudi. Der isch au bsondrs, aber id ganz so wia dia andre Hirsch. Dr Rudi hat nähmli a gans schpezielle Nos und dia isch roat. Id bloss so a bissla roat wia vielleicht uir Riachkolba, wenn’r an Kadar hant oder an Schnaps drunga. Noi, dr Zinka vom Rudi isch a so roat, daas es glei leichtet. Ond do fangt mei Gschicht a.

Weil, des kennts’r eich ja vorstella, des war id immr oifach fiar da Rudi mitema solcha ausdrucksstarka Organ mitta em Gsicht. Dia andre Hirsch warent nämli recht schlechte Hond ond handt dr Rudi allawei ausglachat ond Sprich gmacht ibr sei roata Nos. Wenn’d andrsch bisch als wia dia andre, nau hasch’s id leicht. Freili hot dr Niklaus gschimpft ond gsagt, daas des id gatt, daas dia da Rudi auslachant ond ihre Sprich machant. Abr dia ham freili id aufghert. Wia gsagt, dr Rudi hats id schee ghabt.

Abr en oim Johr am Heiliga Obad, da isch ebbes bassiert. Ond zwar hats an Neabl ghabt. Jetzt id bloss so a bissle. Noi, wia an dr Zusam bei mir dahoim im Herbscht: A gscheidr Neabl, dr Niklaus het seine oigana Griffl vorm Grend id gseha. Es hat id vill gfehlt, no hett dr Niklaus id fliaga kenna. Kennts’r ja selbr vom Urlaub: Wenn’s an Neabl hat, nau ka dr Fliagr id landa odr starta.

„Was doa?“, hat si dr Niklaus gfragat. Dia Kendr wartn doch auf dia Gschenkla. S’Weihnachtsfescht ka doch id ausfalla! Ond wia’r so ieberleggt ond bloß dr graue Neabl siegt, do scheinat aufamal dia Nos vom Rudi, der ausm Stall komma isch, um zum gugga, was dau los isch ond was dia ganza Aufregung soll. Dau hat dr Niklaus glacht, abr id, dr Rudi ausglacht. Noi, er hat glacht, weil dia Weihnacht doch id gstricha war. Ihr kennt’s eich wahrscheinli scho vorstella, was dr Niklaus jetzt gmacht hat. Er hat’n Rudi gnomma ond ganz vorna eigspannt, no vor dia andre Hirsch. Mei, ham dia vialleicht guggat. Ausgrechnat dr Rudi het solla vorna weg springa! Abr dann handt se alle eigseha: Ohne da Rudi wer’s id ganga. Mit seim roata Zinka hat’r da Weag gleichtat ond dr Niklaus hat seine Gschenkla vertoila kenna. Dia Weihnacht war grettet!

Ond wia se alle mea dahoim waren, nau hat koiner mer ibr dr Rudi ond sei Nos glachat. Vom Niklaus hat dr Rudi a ekschtrigs Fuatr kriagt, weil er sei Sach so guad gmacht hat. Ond weil dr Rudi a guader Lapp war, hat‘r mit dia andre Hirsch doilat – und im Johr drauf handt se drauf bschtanda, daas dr Rudi wiedr vorna na gat, obwohl’s in dem Johr gar koin Neabl ghett hat. (mh)

Kommentare

Anmelden um Kommentare zu schreiben
Beitrag von LeserReporter: Enrico Baumann
23. Dezember 2020 - 11:38

Gratulation, Respekt, Hochachtung
Welch eine wunderbare, nette Geschichte zur Weihnachtszeit.
Herzlichen Dank und

weihnachtliche Grüße,
Enrico Baumann

Beitrag von: Markus Höck
23. Dezember 2020 - 16:59

Vielen Dank für die freundlichen Worte! Schöne Weihnachten!

 


X