Es gaid a baar Sacha, dia mached mi echt wuadig. Komm i an da Blärrer na, wo dr ganze Dag mei Audo schdod,
siag i scho vo dr Weide, dass i widdr so an Zeddl an dr Fahrerdiar schdegga hab, wo so ogfähr drauf schdod: Egal wia dei Audo ausgugga
duad, egal wia ald, ob mid odr ohne TÜV – mir kaufed die Karre.
Vor a baar Joar han i a alds Auto verkaufa wolla, grad eba an so an Händler. Vo viere hab i d’Kärdla ghed ond agruafa. Dr Erschde: „Ich habe gerade genug Autos, nein, will ich nicht.“ Dr Zwoide: „Was für Auto? Auto nix gut,“ ond hod oifach aufglegd. Dr Dridde: „So ein altes Auto kann ich nicht gebrauchen.“ Midm Vierda hab i dadsächlich an Termin zom Audo Agugga ausgmachd, abr komma isch er ned, ab-gsagd hod er ned, aruafa hab i eam au nemme kenna. Wia mas erwarda duad: Em Audogschäfd san vill grumme Hund ondrweags, ond dia, dia daured ogfrogd Kärdla an d’Audofenschdr schdegga lossed, dia sodd ma all dia Kärdla mid dr Hand aufglauba lossa, dia romflagged. I glaub, ondr deane isch koi oizig Guadr drbei.
Des Neieschde isch edzd, dass se Kärdla macha lossed, dia beschichded send, damid se durch da Reaga ned so aufquelled ond längr lesbar send, nemme verrodded. Ma kennd dia Lumba au wega Omweldverschmudzong azeuga. Abr i glaub aufglauba lossa wär effegdivr. Muass i do edzd Polizei aruafa?
Kommentare